فلم سائیکو کا دھماکے دار ٹریلر جاری، عید پر سنیما گھروں میں تہلکہ متوقع

 لاہور( شوبز ڈیسک)تھرل، ایکشن اور سماجی مسائل کی عکاسی کرتی فلم سائیکو کا ٹریلر لاہور کے ایک مقامی ہوٹل میں منعقدہ تقریب میں جاری کر دیا گیا، جس میں فلم کی کاسٹ نے بھی شرکت کی۔فلم کے میڈیا شراکت دار جیو فلمز ہیں، جبکہ یہ فلم عید الاضحیٰ کے موقع پر سنیما گھروں میں نمائش کے لیے پیش کی جائے گی۔معروف اداکار شان شاہد نے اس فلم میں نہ صرف مرکزی کردار ادا کیا ہے بلکہ ہدایت کاری کے فرائض بھی انجام دیے ہیں۔ ان کا کہنا ہے کہ فلم سائیکو اہم معاشرتی موضوعات کو اجاگر کرتی ہے۔اداکارہ میرا نے کہا کہ فلم کے کردار نہایت گہرے اور پیچیدہ ہیں اور انہیں ان کرداروں سے باہر نکلنے میں خاصا وقت لگا۔فلم کی کاسٹ میں شان شاہد، میرا، جاوید شیخ، سونیا حسین سمیت دیگر معروف فنکار شامل ہیں، جبکہ شائقین اس فلم کی ریلیز کا بے چینی سے انتظار کر رہے ہیں۔