کاؤنٹی کرکٹ میں نیا قانون ایسیکس نے پہلا انجری متبادل کھلاڑی شامل کر لیا

لاہور( سپورٹس ڈیسک)انگلش ڈومیسٹک کرکٹ میں متعارف کرائے گئے نئے قانون کے تحت ایسیکس نے انجری متبادل کھلاڑی استعمال کرنے والی پہلی ٹیم ہونے کا اعزاز حاصل کر لیا۔کاؤنٹی چیمپئن شپ کے پہلے ہی روز ٹیم کے کپتان ٹام ویسٹلی انگلی کی انجری کے باعث میچ سے باہر ہو گئے، جب انہیں سونی بیکر کی گیند لگی۔ وہ اٹھائیس رنز بنا کر ریٹائرڈ ہرٹ ہو گئے اور بعد ازاں میڈیکل ٹیم نے تصدیق کی کہ وہ مزید میچ نہیں کھیل سکیں گے۔اس صورتحال میں ٹیم نے میچ ریفری اسٹیو ڈیوس سے اجازت حاصل کرنے کے بعد اکیس سالہ آل راؤنڈر نوح تھین کو متبادل کے طور پر شامل کر لیا۔ریفری کے فیصلے کے مطابق نوح تھین کو بولنگ کی اجازت نہیں ہوگی، تاہم وہ بیٹنگ کر سکیں گے، جس کے باعث ٹیم کو اضافی بلے باز استعمال کرنے کا موقع ملے گا۔نئے قانون کے تحت زخمی کھلاڑی کی جگہ متبادل شامل کرنے کی اجازت کو کھلاڑیوں کی حفاظت اور ٹیموں کو سہولت فراہم کرنے کے لیے اہم پیش رفت قرار دیا جا رہا ہے۔