ٹیکس مقدمات کے فوری فیصلے وقت کی اہم ضرورت ہے، عدالتی پالیسی کمیٹی کا اہم اجلاس

اسلام آباد( پاکستان خبر)اسلام آباد میں چیف جسٹس پاکستان یحییٰ آفریدی کی زیرصدارت عدالتی پالیسی ساز کمیٹی کا اجلاس منعقد ہوا، جس میں ٹیکس مقدمات کے بروقت فیصلوں اور عدالتی کارکردگی بہتر بنانے کے اقدامات پر غور کیا گیا۔اجلاس میں سپریم کورٹ کے جسٹس میاں گل حسن اورنگزیب، وزیر اعظم کی ٹاسک فورس کے چیئرمین شاد محمد خان اور چیئرمین ایف بی آر شریک ہوئے، جبکہ ہائیکورٹس کے نامزد ججز نے ویڈیو رابطے کے ذریعے شرکت کی۔چیف جسٹس نے اس موقع پر کہا کہ ٹیکس تنازعات کا مؤثر اور بروقت حل عوامی اعتماد کے فروغ اور طرز حکمرانی میں بہتری کے لیے نہایت ضروری ہے۔اجلاس کے دوران جسٹس میاں گل حسن اورنگزیب نے اپنے حالیہ فیصلے کے حوالے سے فورم کو آگاہ کیا، جس میں ٹیکس مقدمات کے طریقہ کار میں موجود رکاوٹوں کی نشاندہی کرتے ہوئے اصلاحی تجاویز پیش کی گئی ہیں۔اجلاس میں ادارہ جاتی ہم آہنگی بڑھانے اور نظام کو مزید مؤثر بنانے پر بھی زور دیا گیا۔