اسٹنٹ کے دوران اکشے کمار زخمی، ویڈیو نے مداحوں کو تشویش میں مبتلا کر دیا

ممبئی( شوبز ڈیسک)بالی ووڈ کے معروف اداکار اکشے کمار اپنی نئی ہارر کامیڈی فلم بھوت بنگلہ کی شوٹنگ کے دوران زخمی ہو گئے، جس کی ویڈیو سوشل میڈیا پر تیزی سے وائرل ہو رہی ہے۔فلم کی پروڈکشن ٹیم کی جانب سے جاری کی گئی ویڈیو میں دیکھا جا سکتا ہے کہ اداکار ایک ایکشن سے بھرپور منظر کی شوٹنگ کے دوران چوٹ کا شکار ہو جاتے ہیں۔ تاہم یہ واضح نہیں ہو سکا کہ یہ واقعہ کب پیش آیا اور انہیں کس نوعیت کی چوٹ لگی۔یاد رہے کہ اکشے کمار اپنی شاندار اداکاری کے ساتھ ساتھ خطرناک مناظر خود انجام دینے کے لیے بھی مشہور ہیں۔ مارشل آرٹس میں مہارت رکھنے والے اداکار ماضی میں بھی اپنے اسٹنٹس خود کرنے کو ترجیح دیتے رہے ہیں۔ایک حالیہ انٹرویو میں انہوں نے کہا تھا کہ فلموں میں ایکشن مناظر کے لیے جدید ٹیکنالوجی پر بڑھتے ہوئے انحصار سے وہ مطمئن نہیں اور حقیقت کے قریب مناظر کو ترجیح دیتے ہیں۔