رومانوی مناظر پر ہنسی چھوٹ جاتی تھی، علی رضا کا دلچسپ انکشاف

اسلام آباد ( شوبز ڈیسک) اداکار علی رضا نے انکشاف کیا ہے کہ اداکارہ حنا آفریدی ان کے لیے فیملی ممبر کی حیثیت رکھتی ہیں اور رومانوی مناظر کی شوٹنگ کے دوران اکثر ہنسی آ جاتی تھی۔ایک انٹرویو میں دونوں فنکاروں نے اپنے اداکاری کے تجربات اور مختلف پہلوؤں پر کھل کر بات کی۔ میزبان کی جانب سے نجی ٹی وی ڈرامے کے رومانوی مناظر سے متعلق سوال پر علی رضا نے بتایا کہ جب بھی ایسے مناظر فلمائے گئے تو دونوں بے ساختہ ہنس پڑتے تھے، تاہم پیشہ ورانہ انداز اپنانے سے کام آسان ہو جاتا تھا۔انہوں نے کہا کہ حنا آفریدی ان کی قریبی دوست ہیں اور ان کے درمیان ایک اعتماد اور ہم آہنگی کا ماحول موجود ہے، جس کی بدولت انہوں نے کئی ایسے مناظر بھی کامیابی سے مکمل کیے جن کی توقع کم کی جا رہی تھی۔اداکارہ حنا آفریدی نے بھی اس موقع پر بتایا کہ بعض مناظر میں وہ علی رضا سے مشورہ کرتی تھیں اور پھر ہدایتکار سے رہنمائی لے کر سین کو بہتر انداز میں مکمل کیا جاتا تھا۔