سونے کی قیمت میں بڑا جھٹکا، نئی بلند ترین سطح

کراچی ( کامرس ڈیسک) عالمی اور مقامی مارکیٹوں میں سونے کی قیمت میں اچانک بڑا اضافہ ریکارڈ کیا گیا ہے جس کے بعد قیمت نئی بلند ترین سطح پر پہنچ گئی ہے۔بین الاقوامی بلین مارکیٹ میں بدھ کے روز فی اونس سونے کی قیمت ایک سو ستاون ڈالر اضافے کے ساتھ چار ہزار آٹھ سو چودہ ڈالر ہو گئی۔عالمی رجحان کے زیر اثر مقامی صرافہ بازاروں میں بھی چوبیس قیراط فی تولہ سونے کی قیمت میں پندرہ ہزار سات سو روپے کا نمایاں اضافہ ہوا، جس کے بعد نئی قیمت پانچ لاکھ چار ہزار ایک سو باسٹھ روپے تک پہنچ گئی۔اسی طرح دس گرام سونے کی قیمت تیرہ ہزار چار سو ساٹھ روپے اضافے کے بعد چار لاکھ بتیس ہزار دو سو سینتیس روپے ہو گئی۔دوسری جانب چاندی کی قیمت میں بھی اضافہ دیکھا گیا، جہاں فی تولہ چاندی چار سو چالیس روپے مہنگی ہو کر آٹھ ہزار ایک سو چوراسی روپے تک پہنچ گئی جبکہ دس گرام چاندی کی قیمت تین سو ستتر روپے اضافے کے بعد سات ہزار سولہ روپے ہو گئی۔قیمتوں میں اس تیزی سے زیورات کی خریداری مزید مہنگی ہونے کا امکان ظاہر کیا جا رہا ہے۔