جنگ بندی پر شوبز شخصیات کا ردعمل، حکومت کو خراج تحسین

اسلام آباد ( شوبز ڈیسک) امریکا اور ایران کے درمیان جنگ بندی میں پاکستان کے کردار پر شوبز شخصیات کی جانب سے حکومت کی تعریف کا سلسلہ جاری ہے۔رپورٹس کے مطابق دونوں ممالک کے درمیان گزشتہ چند ہفتوں سے جاری کشیدگی کے خاتمے میں پاکستان نے اہم سفارتی کردار ادا کیا، جس کا مقصد جنگ کو روکنا اور دنیا میں معمولات زندگی کو بحال کرنا تھا۔پاکستان کا بطور امن قائم کرنے والے ملک کردار نہ صرف عالمی سطح پر سراہا جا رہا ہے بلکہ ملکی شوبز شخصیات بھی اس پیش رفت پر خوشی اور اطمینان کا اظہار کر رہی ہیں۔اداکار احسن خان نے ایک ویڈیو پیغام میں جنگ بندی کو خوش آئند قرار دیتے ہوئے کہا کہ یہ ایک بڑی کامیابی ہے اور اس سے عالمی امن کو فروغ ملے گا۔ انہوں نے پاکستانی قوم کو مبارکباد دیتے ہوئے کہا کہ یہ کامیابی قابل جشن ہے اور حکومت اس پر خراج تحسین کی مستحق ہے۔انہوں نے امید ظاہر کی کہ مستقبل میں بھی اسی طرح کے مثبت اقدامات جاری رہیں گے اور قوم کو متحد ہو کر ملک کی ترقی میں کردار ادا کرنا چاہیے۔واضح رہے کہ پاکستان کی سفارتی کوششوں کے نتیجے میں امریکا اور ایران کے درمیان دو ہفتوں کی جنگ بندی عمل میں آئی، جس کے بعد ایران نے آبنائے ہرمز کو بھی عارضی طور پر کھولنے کا اعلان کیا جو عالمی تیل کی ترسیل کے لیے اہم گزرگاہ ہے۔مزید برآں دونوں ممالک کی اعلیٰ قیادت کی دس اپریل کو اسلام آباد میں متوقع ملاقات بھی اس پیش رفت کو مزید آگے بڑھانے میں اہم ثابت ہو سکتی ہے۔