اسپائیڈر مین کا کردار سوشل میڈیا سے معلوم ہوا، ٹام ہالینڈ کا انکشاف

نیویارک( شوبز ڈیسک)ہالی ووڈ اداکار ٹام ہالینڈ نے انکشاف کیا ہے کہ انہیں مشہور کردار اسپائیڈر مین ملنے کی خبر ایک غیر متوقع انداز میں سوشل میڈیا کے ذریعے ملی جس پر وہ خود بھی حیران رہ گئے۔ایک پوڈکاسٹ انٹرویو میں گفتگو کرتے ہوئے انہوں نے بتایا کہ وہ کئی ہفتوں سے اس کردار کے لیے بے چینی سے انتظار کر رہے تھے لیکن انہیں براہ راست کوئی اطلاع نہیں دی گئی۔ اسی دوران مارول اسٹوڈیوز کی جانب سے ایک پوسٹ شیئر کی گئی جس میں مداحوں کو ویب سائٹ پر جا کر نئے اسپائیڈر مین کا نام جاننے کا کہا گیا تھا۔ٹام ہالینڈ کے مطابق جب وہ اس ویب سائٹ پر گئے تو یہ دیکھ کر حیران رہ گئے کہ انہیں ہی نئے اسپائیڈر مین کے طور پر منتخب کیا گیا ہے۔ان کا کہنا تھا کہ اس وقت تک وہ یہ سمجھ چکے تھے کہ شاید انہیں یہ کردار نہیں ملا کیونکہ اسٹوڈیو کی جانب سے کوئی رابطہ نہیں کیا گیا تھا، تاہم اس غیر متوقع اعلان نے انہیں خوشگوار حیرت میں مبتلا کر دیا۔